Útbúgving og starvsroyndir:
M.A. í føroyskum og fronskum máli og bókmentum.
Lisið vegleiðing á Fróðskaparsetri Føroya

Løgtingskvinna síðani valið 1.september 2015. Forkvinna í mentanarnevnd løgtingsins.
Landsstýriskvinna í Útbúgvingar og granskingarmálum síðani 14.februar.

Starvsroyndir m.a. frá Miðnámsskúlanum á Kambsdali sum undirvísari og sum lestrarvegleiðari.

Politiskar og líknandi royndir:
Býráðslimur í Eysturkommunu og forkvinna í Vinnu- og havnanevndini (farloyvi síðani febr.2019), tingkvinna fyri Framsókn og næstforkvinna í Framsókn. Harafturat franskur konsul í Føroyum.

Sum ein av stigtakarunum til Framsókn og vald í Eysturkommunu býrað á listanum hjá Framsókn leggi eg drúgvar royndir við politiskum virksemi og uml.11 ára royndir í býráðsarbeiði og formansarbeiði til.

Framsókn kann vera við til at taka munandi stig á rættari kós fyri okkara samfelag.

Frá ungum aldri havi eg arbeitt fyri størri sjálvbjargni og sjálvstøðugum Føroyum. Korini hjá einstaklinginum og vinnulívi hava eisini havt mín stóra áhuga og hesi virði eru grundarlag undir øllum arbeiði, eg fáist við.

Seinnu árini havi eg arbeitt nógv við útbúgvingarpolitikki og mentanarpolitikki eins og einum fjølbroyttum úrvali av málum innan kommunalpolitikk, sum varatingkvinna og nú sum vald tingkvinna innan landspolitikk.

Afturat hesum koma royndir frá altjóða og norðurlendskum virksemi.

Serligan ómak til serligan tørv

2019-08-19 10:12

At Føroyar í størri og størri mun hava tikið sær av sínum egnu við serligum tørvi, og hava samtykt Altjóða Breksáttmálan, hevur gjørt okkara land betri!

• Nú skal brekpolitiska virkisætlanin raðfestast
• Óhefta eftirlitið við Altjóða Breksáttmálanum eigur at verða sett í verk
• Vit mugu fáa betri hagtalstilfar, upplýsingar og granskingartilfar innan brekøkið í Føroyum

Eg ætli framhaldandi at stuðla undir og kempa fyri rættindum, skúlatilboðum, virknis- og arbeiðstilboðum eins og bústaðarloysnum fyri fólk við serligum tørvi.
Eg leggi mína orku og slagkraft í hetta, at vit koma á eitt væl hóskandi støði, sum fremur, at rætta hjálpin ongantíð er langt burtur í tíð ella á staði.
Ein tann ringasta støðan, eg sum politikkari kann koma í, er tá ein familja við einum barni, sum hevur serligan tørv, stendur ráðaleys.

Ætlan, ráðgeving og vegleiðing
• Ein vegleiðing kring skúla-, menningar- og starvsmøguleikar skal setast á stovn, ein møgulig staðseting er nýggja Vegleiðingarstovan, har vitan um yrkis- og útbúgvingarmøguleikar í løtuni verður savnað
• Arbeiðið við OCN skipanini skal útbyggjast, so fleiri fáa gagn av, at førleikar verða skjalprógvaðir
• Ein ætlan um samsipað heildartilboð skal gerast fyri hvørt barn við serligum tørvi, so samanhangur og rættstundis fyrireiking kunnu vera grundkor í lívinum hjá barninum, tí unga og teimum avvarðandi

Eg fari at gera mær serligan ómak at fylgja málum viðvíkjandi børnum og ungum við serligum tørvi:
• Serflokkar og sertilboð skulu mennast innan fólkaskúlan
• Rásin skal útbýggjast, sum ætlanir eru lagdar um
• Serligt skipað miðnám skal útbyggjast
• Dygdargóð, mennandi og trygg tilboð til teirra, sum ikki fylgja hesum skipanum
• Menning og endurmenning skulu styrkja likamligan, sálarligan, sosialan og vinnuligan førleika

Mál og samskifti
Eg eri glað fyri, at eg á vári 2017 legði uppskot fram um at viðurkenna teknmál sum mál í Føroyum, og at tað varð samtykt á sumri í 2017. Hetta er nú partur av ábyrgdarøkinum hjá Málráðnum.
• Arbeiðið við føroyskum teknmáli skal styrkjast meira
• Børn, sum eru deyv ella hoyriveik, skulu hava veruligan rætt til at fáa frálæru í teknmáli. Avvarðandi og onnur skulu eisini hava betri møguleikar at læra teknmál
• Møguleikin hjá tí deyva og hoyriveika at samskifta á teknmáli í øllum lívinum skal støðugt víðkast
• Teknmálstulking skal sum heild styrkjast

Karlstadmodellið er ein arbeiðsháttur, sum hjálpir mongum børnum at samskifta, og eg eri glað um, at hava raðfest Karlstad arbeiðsháttin innan m.a. Sernám.
• Tilfarið til Karlstad arbeiðsháttin skal nú føroyskast sum skjótast.
• Betri rúmd fyri Karlstad- modellinum skal finnast innan serøkið kring landið
• Ein ætlan skal gerast fyri at menna og stuðla víðkaðum og øðrvísi samskiftishættum í Føroyum - eisini slíkum sum samskiftisappin AVAZ FO
• Vitanin um hetta at hoyra, tosa, minnast, skriva og lesa skal savnast. Upp í hetta hoyrir eisini at menna ráðgeving um tøknilig hjálpartól á økjunum. 

Bústaðir

Tað er eingin ivi um, at tá tað kemur til bústaðir til fólk við serligum tørvi, tá hevur landið sera stóra ábyrgd. Hesa ábyrgd skulu vit taka!

• Bíðilistin til bústað fyri fólk, sum bera brek, skal styttast skjótt og fáast burtur
• Bústaðir til fólk við serligum tørvi skulu fremja tað sjálvbjargni, sum brúkarin, hevur, fær undir útbúgving og menning, og sum skal haldast viðlíka.

Framsókn sigur í valskránni: “Serøkið skal rigga so væl, at familjur við børnum og ungum, sum hava serligan tørv, kenna á sær, at røttu skúla-, virknis- og bútilboðini eru tøk til røttu tíð.”

Eg bjóði meg fram at gera mítt ítarsta, at hetta lyfti gerst veruleikin í Føroyum!
Hanna Jensen, valevni fyri Framsókn