Útbúgving og starvsroyndir:
M.A. í føroyskum og fronskum máli og bókmentum.
Lisið vegleiðing á Fróðskaparsetri Føroya

Løgtingskvinna síðani valið 1.september 2015. Forkvinna í mentanarnevnd løgtingsins.
Landsstýriskvinna í Útbúgvingar og granskingarmálum síðani 14.februar.

Starvsroyndir m.a. frá Miðnámsskúlanum á Kambsdali sum undirvísari og sum lestrarvegleiðari.

Politiskar og líknandi royndir:
Býráðslimur í Eysturkommunu og forkvinna í Vinnu- og havnanevndini (farloyvi síðani febr.2019), tingkvinna fyri Framsókn og næstforkvinna í Framsókn. Harafturat franskur konsul í Føroyum.

Sum ein av stigtakarunum til Framsókn og vald í Eysturkommunu býrað á listanum hjá Framsókn leggi eg drúgvar royndir við politiskum virksemi og uml.11 ára royndir í býráðsarbeiði og formansarbeiði til.

Framsókn kann vera við til at taka munandi stig á rættari kós fyri okkara samfelag.

Frá ungum aldri havi eg arbeitt fyri størri sjálvbjargni og sjálvstøðugum Føroyum. Korini hjá einstaklinginum og vinnulívi hava eisini havt mín stóra áhuga og hesi virði eru grundarlag undir øllum arbeiði, eg fáist við.

Seinnu árini havi eg arbeitt nógv við útbúgvingarpolitikki og mentanarpolitikki eins og einum fjølbroyttum úrvali av málum innan kommunalpolitikk, sum varatingkvinna og nú sum vald tingkvinna innan landspolitikk.

Afturat hesum koma royndir frá altjóða og norðurlendskum virksemi.

Ja, vegleiðingin er raðfest og styrkt!

2019-08-16 09:58

Herfyri læt Vegleiðingarstovan upp á Hoydalsvegi 1, og endamálið er lýst soleiðis á heimasíðuni hjá Undirvísingarstýringum: “karrieruvegleiðing eigur at verða lætt atkomilig hjá øllum borgarum í Føroyum, og brúk er fyri eini meira samanhangandi vegleiðingarskipan, sum ger gagn av vitan og førleikum, sum í dag liggja meira og minni avbyrgd úti á skúlum, hjá myndugleikum, stovnum og øðrum runt í landinum. Tí verður nú farið í holt við ein a royndarverkætlan at savna verandi vegleiðingartænastur í eina skipan, sum kann tryggja samvirkan og samstarv, og sum eisini fær eitt fysiskt stað.”

Í samgonguskjalinum hjá CEF stendur: “Samgongan vil menna lestrarvegleiðing og stovna skipan, ið skal byggja brúgv millum fólkaskúlan og miðnám kring alt landið.”
Og: “Útbúgvingarpolitikkurin byggir á hugsjónina um lívslanga læru, og farið verður í holt við at fyrireika at seta á stovn vaksnamannaútbúgving. Neyðugir tættir í eini tílíkari skipan eru lívslong vegleiðing og førleikameting eins og ymisk sløg av førleikamenning og eftirútbúgving.”

Samgongan hevur raðfest førleikametingina, sum fór í gongd í fjør, og grundað á góðu royndirnar er verkætlanin júst longd. Harafturat er semja gjørd við Arbeiðsgevarafelagið, Handverksmeistarafelagið og við handverkarafeløgini og Starvsmannafelagið um, at trípartarsamráðingar skulu byrja í heyst um eina Vaksnamannaútbúgvingarskipan.
Í sambandi við ta fyrstu trípartasemjuna innan hetta økið, so samdust partarnir um eina felags verkætlan við felags fígging at kunna um, vegleiða til og marknaðarføra yrkisútbúgvingar. Verkætlanararbeiðið er farið í gongd.

Eg hoyrdi eitt gleps í einum miðli ein dagin, um at skúlavegleiðingin varð uppraðfest. Og ja, tað er við stórari gleði og við stórum nøgdsemi, at eg kann siga: ja, skúlavegleiðingin er styrkt, tí hon er ein týdningarmikil liður í heildarætlanini fyri at styrkja vegleiðing til frama fyri starvsleiðina og møguleikarnar hjá borgarum í Føroyum; hetta at rúmd verður fyri at arbeiða við eitt sindur yngru flokkunum og samstarva við partarnar uttanfyri skúlagátt um evnið “útbúgvingar- og yrkisval”.

Hendan samgongan hevur veruliga gjørt og framt nógv av tí, sum hon lovaði, og sum hon niðurfeldi í samgonguskjalið.
Framsókn bjóðar seg fram at framhaldandi fremja veruligan munagóðan politikk – eisini innan útbúgvingarøkið, eins og vit hava gjørt hetta valskeiðið.

Eg eri til taks samskifta um okkara politikk, og seti tykkara stuðul til valið, 31.august, ómetaliga høgt.
Hanna Jensen