Útbúgving og starvsroyndir:
M.A. í føroyskum og fronskum máli og bókmentum.
Lisið vegleiðing á Fróðskaparsetri Føroya

Starv: lærari og vegleiðari á Miðnámi á Kambsdali

Franskur konsul í Føroyum

Starvsroyndir m.a. frá Miðnámsskúlanum á Kambsdali sum undirvísari í fronskum og føroyskum og sum lestrarvegleiðari og sum føroysktlærari á Tekniska Skúla í Klaksvík.

Politiskar og líknandi royndir:
Løgtingskvinna og forkvinna í mentanarnevnd løgtingsins frá setp. 2015 til februar 2019.
Landsstýriskvinna í Útbúgvingar og granskingarmálum frá februar til september 2019.

Varatingkvinna fyri Framsókn 2011-2015

Býráðslimur í Eysturkommunu síðani 1.januar 2009.
Forkvinna í Trivnaðarnevndini 2009-2012
Forkvinna í Mentanarnevndini 2013-2016 Forkvinna í Vinnu- og havnanevndini 2017-2020

Sum ein av stigtakarunum til Framsókn og vald í Eysturkommunu býrað á listanum hjá Framsókn leggi eg drúgvar royndir við politiskum virksemi og uml.12 ára royndir í býráðsarbeiði og formansarbeiði til.

Framsókn kann vera við til at taka munandi stig á rættari kós fyri okkara samfelag.

Frá ungum aldri havi eg arbeitt fyri størri sjálvbjargni og sjálvstøðugum Føroyum. Korini hjá einstaklinginum og vinnulívi hava eisini havt mín stóra áhuga og hesi virði eru grundarlag undir øllum arbeiði, eg fáist við.

Seinnu árini havi eg arbeitt nógv við útbúgvingarpolitikki og mentanarpolitikki eins og einum fjølbroyttum úrvali av málum innan kommunalpolitikk, sum varatingkvinna, sum vald tingkvinna og landsstýriskvinna innan landspolitikk.

Afturat hesum koma royndir frá altjóða og norðurlendskum virksemi.

Enn ein kunngerðarbroyting til bata fyri okkara lesandi – og okkum!

2018-12-18 04:54

Enn ein góð kunngerðarbroyting er nú framd, sum er til bata fyri okkara lesandi, sum vilja fara til lond, har hvørki norðurlendskt mál, ei heldur enskt eru høvuðsmál, men sum vilja royna at lesa í londum, har tey umframt faklesturin hava tørv á at læra seg nýggj tungumál. Tílík taka ikki bert vitan úr hesum ofta fjarskotnu londum við heim, men eisini koma tey aftur við serligum málførleikum, sum eru sera gagnligir fyri okkara samfelag.

Nú er kunngerðin um málsligt fyrireikingarskeið víðkað, so til ber at taka slíkt málsligt skeið beint eftir lokna útbúgving í fremmanda landinum, miðskeiðis í lestrinum, ella samstundis sum lisið verður. Tað gevur tí føroyska lesandi fleiri valmøguleikar, tá hon ella hann skulu velja útbúgvingarland og taka avgerðir um at taka enskmæltar útbúgvingar fyri altjóða lesandi í londum við fremmandum tungumáli, ella um tey skulu fara eftir at lesa á útbúgvingunum saman við lokala fólkinum og harvið fara djúpari inn í mentan, vitan og mál í viðkomandi landi.

Fyrr hevur bert verið møguligt at fáa lán, sum eftir serligum treytum kann gerast studningur, til málsligt fyrireikingarskeið áðrenn farið varð undir hægri lestur í landi við fremmandum máli. Tað kann vera ein ov stórur biti fyri ein, sum fyrstu ferð fer í fjarskotin lond ella fremmandar mentanir at lesa, at taka endaligu avgerðina um at lesa heilar útbúgvingar har. Nú er møguleiki at taka avgerðina um at læra seg lokala málið, eftir at útbúgvingarleið er byrjað, eins og beint eftir at hon er lokin.

Hervið fær tann lesandi møguleika til ymiskar tilgongdir í mun til at læra eitt rættiliga fremmant mál og at lesa sína útbúgving ella part av henni á hesum máli.

Men føroyska samfelagið fær eisini størri vinning av, at fleiri verða motiverað og fáa møguleikar at fáa sær hendan málsliga førning. Tílíkur førleiki er til gagns bæði í starvsmøguleikunum hjá tí einstaka, men sanniliga eisini fyri Føroyar í mun til mentan, mál, útbúgving, vinnu, diplomati og politikk.

Lesið skrivliga fyrispurning, eg setti landsstýriskvinnuni í 2016, um at fáa hesa broyting framda:

https://logting.fo/casewritten/view.gebs?menuChanged=17&caseWritten.id=905&fbclid=IwAR22ylsVeP8QL_dgRj2I2mmyhbxrb-w3Nb2Pkxt6jHG1OAc1wzU8YHXe73s