Rúni Sundberg Patursson

Føddur 01 apríl 1983 í Havn.

Uppvaksin í Hoyvík í dag búsitandi í Havn.

Sonur Karl og Eyð Patursson búsitandi í Hoyvík

Unnusta er Joan Kjelnæs, og saman eiga tey trý børn. Rebekka (2005), Sandra (2007)og Eva (2011)

Hevur lokið HH prógv frá Føroya Handilsskúla í 2004.

Fór síðan í læru sum skrivstovufólk hjá P/F Poul Michelsen Heilsølu og bleiv útlærdur í 2006

Rúni helt fram hjá P/F Poul Michelsen eftir lokna lærutíð, sum sølufólk/sølusamkipari til og við 2010

Millum 2010 og 2012 starvaðist Rúni sum handilsleiðari hjá matvøruhandlinum PE á Heykavegnum 2 í Havn.

Í Juli 2012 var Rúni settur í starv sum søluleiðari innan Retail hjá P/F Poul Michelsen

Rúni er eisini partur av familju fyritøkuni Sp/F Maskinkoyring, har hann er nevndarformaður.

Í frítíðini er Rúni er sera virkin innan hundavenjing, har hann millum annað sjálvur er virkin hundavenjari, kappinga dómari og næstformaður hjá áhugafelagnum Føroya Civila Hundaførarafelag – FCH.

Rúni Sundberg Patursson

Pláss fyri hundaeigarum.

2012-10-30 02:27

 Mett verður, at áleið fjórða hvørt húskið í havn hevur ein ella fleiri hundar. Hóast hetta, er einki tilboð fyri hundaeigarar í Tórshavnar Kommunu.

Býráði gjørdi her fyri ein stuttan film um hundar í havn. Tað ið serliga endurspeglaði seg í stuttfilminum, var hvat býráði metir um okkum hundaeigarar.  Í staðin fyri máli við hundalortum var tikið í álvara, var heldur gjørt gjøldur burtur úr hesum. Filmurin virkar heldur sum lýsing fyri býráðslimirnar. Peningurin skuldi heldur verði brúktur til, at betra um umstøðurnar hjá hundaeigarum. Tað eru tíanverri nakrir ábyrgdarleysir hundaeigarar, ið ikki taka upp eftir hundinum. Men veruligi trupulleikin er heldur teir leysgangandi hundarnir, ið umframt  ikki taka upp eftir sær sjálvum, eru til sera stóran ampa fyri fólk.

Hundafeløgini í Føroyum hava seinastu árini gjørt eitt megnararbeiði við, at upplýsa hundaeigarum um hundahald. Feløgini skipa javnan fyri venjing, kapping, framsýning, kunning og fleiri øðrum áhugaverdum tilboðum fyri hundum og hundaeigarum. Hetta sjálvbodna arbeiði eiga feløgini og tær eldsálir, ið hava hundar sum frítíðarítriv, sera stóra tøkk fyri.

Nú er tíðin komin til, at hundaeigarar í Tórshavnar Kommunu vera raðfestir. Tað skal sjálvandi vera pláss fyri øllum í Tórshavnar Kommunu.

Tey komandi árini vil eg arbeiða fyri, at útvega fleiri fríøki til hundar. Øki har hundar hava møguleiki, at renna leysir uttan ampa fyri onnur. Hesi øki vera skipaði sum hundaskógir, vit eitt nú kenna frá Danmark. Hetta krevur ikki tær stóru íløgurnar, eitt øki í rímuligari stødd, ið er turt og væl innhegnað. Tað eru longu øki ið eru vælegnaði til hetta í kommununi, eitt nú í Havnardali. Eg vil virka fyri, at fyrsta øki longu er tøkt í 2013.

Tórshavn, ein framsøkin høvuðsstaður.

Rúni Sundberg Patursson, valevni á listanum hjá Framsókn

Tórshavn fyri øll!