Áarvegur 2 - Postsmoga 208
110 Tórshavn

Telefon: 312492
Teldupostur: samband@olivant.fo
Heimasíða: www.samband.fo

Magnus spyr um staðseting av almennum stovnum

2019-02-13 06:59
Politikkur - 

Magnus Rasmussen, løgtingsmaður fyri Sambandsflokkin, fer á tingfundinum í dag 13. februar at seta Aksel V. Johannesen, løgmanni, ein munnligan fyrispurning um frágreiðing, hvussu almennir stovnar kundu verðið staðsettir kring landið

Løgtingsmaðurin spyr fylgjandi:

1. Hvussu gongur við at gera frágreiðingina, sum løgtingið samtykti, at landsstýrið skuldi gera?

2. Nær kann væntast, at hon verður liðug?

Í viðmerkingunum til munnliga fyrispurningin sigur Magnus Rasmussen, løgtingsmaður, at Bill Justinnusen, Kári P. Højgaard og undirritaði løgdu fram Uppskot til samtyktar,tann 7. februar 2017. Uppskotið var soljóðandi:

Løgtingið heitir á landsstýrið um at leggja fyri Løgtingi frágreiðing um, hvussu almennir stovnar mest skynsamt kunnu staðsetast kring landið við atliti at teimum økjum í Føroyum, har fáir ella eingir almennir stovnar eru í dag.

Ein samd Rættarnevnd legði fram álit í málinum og tók fult undir við tí. Málið varð eisini samtykt í Løgtinginum 24. mars 2017.

At enda sigur Magnus Rasmussen, løgtingsmaður, í sínum viðmerkingum, at nú skjótt tvey ár eru liðin síðani Løgtingið samtykti uppskotið, so er áhugavert at frætta, hvussu gongur við hesi frágreiðing, sum Løgtingið heitti á landsstýrið at gera.

Sambandsflokkurin

RN