Tað riggar í løtuni ikki at leggja lesarabrøv á Lesarin.fo umvegis Facebook.

Fyribils skulu lesarabrøv sendast til redaktion@knassar.fo, so leggja vit tað út fyri teg.

Lindin - nú eisini sum poddvarp

2021-05-11 07:36
Lindin er føroyskt kristiligt kringvarp, sum ikki er heft at nakrari ávísari samkomu. Lindin byrjaði at senda útvarp 21. jan. 2000. Og síðani tá hevur Lindin trúliga sent útvarp út til føroyingar. Endamálið hjá Lindini er m.a.: at skapa umstøður til at kunngera boðskapin um kærleika Guds gjøgnum kristnan tónleik og bíbliugrundfesta undirvísing, og at gera Føroya fólk tilvitandi um kærleika Guds og fyrigeving syndanna. 

Nú hevur Lindin so lagt poddvarp afturat síni sendikanalum. Tann fyrsta poddvarprøðin hjá Lindini, er ein sendirøð, sum hevur verið útvarpað fleiri ferðir og er óivað tann sendirøðin, ið hevur verið best umtókt í søguni hjá Lindini. Sendirøðin eitur “Ein ferð gjøgnum bíbliuna” og livir sera væl upp til endamálini, ið eru nevnd omanfyri. Tað var Eydna Háberg, sum átti hugskotið til hesa røðina. Tá Eydna fór av landinum, heitti hon á Símun Absalonsen og Jógvan Zachariassen um at taka yvir. Teir báðir fóru síðan ígjøgnum allar bøkurnar í bíbliuni. 

 Hendan røðin kann nú downloadast sum poddvarp á flestu podvarpplattformum, t.d. Apple podcasts og Spotify. Eisini er møguligt at hoyra allar sendingarnar á heimasíðuni sum er upplýst í samband við hesa grein. Framyvir fer Lindin at koma út við fleiri poddvarprøðum.