Útbúgving og starvsroyndir:
M.A. í føroyskum og fronskum máli og bókmentum.
Lisið vegleiðing á Fróðskaparsetri Føroya

Starv: lærari og vegleiðari á Miðnámi á Kambsdali

Franskur konsul í Føroyum

Starvsroyndir m.a. frá Miðnámsskúlanum á Kambsdali sum undirvísari í fronskum og føroyskum og sum lestrarvegleiðari og sum føroysktlærari á Tekniska Skúla í Klaksvík.

Politiskar og líknandi royndir:
Løgtingskvinna og forkvinna í mentanarnevnd løgtingsins frá setp. 2015 til februar 2019.
Landsstýriskvinna í Útbúgvingar og granskingarmálum frá februar til september 2019.

Varatingkvinna fyri Framsókn 2011-2015

Býráðslimur í Eysturkommunu síðani 1.januar 2009.
Forkvinna í Trivnaðarnevndini 2009-2012
Forkvinna í Mentanarnevndini 2013-2016 Forkvinna í Vinnu- og havnanevndini 2017-2020

Sum ein av stigtakarunum til Framsókn og vald í Eysturkommunu býrað á listanum hjá Framsókn leggi eg drúgvar royndir við politiskum virksemi og uml.12 ára royndir í býráðsarbeiði og formansarbeiði til.

Framsókn kann vera við til at taka munandi stig á rættari kós fyri okkara samfelag.

Frá ungum aldri havi eg arbeitt fyri størri sjálvbjargni og sjálvstøðugum Føroyum. Korini hjá einstaklinginum og vinnulívi hava eisini havt mín stóra áhuga og hesi virði eru grundarlag undir øllum arbeiði, eg fáist við.

Seinnu árini havi eg arbeitt nógv við útbúgvingarpolitikki og mentanarpolitikki eins og einum fjølbroyttum úrvali av málum innan kommunalpolitikk, sum varatingkvinna, sum vald tingkvinna og landsstýriskvinna innan landspolitikk.

Afturat hesum koma royndir frá altjóða og norðurlendskum virksemi.

Íløgur í listaøkini nú! – Varðar í Eftirkoronalandi!

2020-04-02 18:07

Listafólkini - breitt talað - verða mong hart rakt av, at samfelagið er avbyrgt móti umheiminum, og at vit innanhýsis ikki kunnu koma saman til konsertir, festivalar, sjónleikir, listaframsýningar, filmssýningar og -stevnur, upplestur og mong onnur tiltøk, har fjølbroytt list er kjarnin. Eisini tí, at búskapurin hevur og fær avbjóðingar, sum ikki einans kann væntast at geva fólki sum heild broytt livikor, men sum heilt víst raka arbeiðsøkið og inntøkumøguleikarnar hjá listafólkum munandi.

Siðbundna vinnan hevur, væntar og fær stórar trupulleikar av Koronustrategiini og av Koronu sjálvari - og teir mugu sum skjótast viðgerast neyvt, eins og støða má takast til røtt og munadygg átøk fyri smærru fyritøkurnar til at klára skerðini til landið Eftirkorona.

Men hvussu við listafólkunum? Avleiðingin á teirra møguleikar at liva av og framleiða meira úr sínum talenti kann gerast enn størri! Tí nær fara vit aftur at koma í støðuna, at hópar av einstaklingum, fyritøkum eins og tað almenna fara at brúka munandi av síni inntøku, sínum yvirskoti og síni fíggjarætlan til uppliving og list í Eftirkoronalandi?

Eins og boðskapurin frá summum vinnugeirum til land og kommunur hevur verið: latið ikki virksemið steðga! Gerið strategiskar verkætlanir og íløgur, sum eru skilagoðar og kunnu útførast! Soleiðis kann boðskapurin sanniliga vera um listaøkini: vit hava serligar tíðir - kanska bestu tíðir til listarliga framleiðslu (at skriva bókmentir, skriva leikrit, til lagasmíð, upptøkur, tíð at hugsavna seg um at mála, tekna, sniðgeva, venja nýtt o.s.fr. )

Listarlig framleiðsla er ein ómissandi partur av einum góðum samfelagi, og í løtuni er hendan vinnan minst líka hótt, sum onnur vinna.

Áttu vit ikki at gjørt skilagóðar íløgur í slíka framleiðslu nú? Og sæð enn fleiri upprunaføroyskar skaldsøgur eins og týðingar, fleiri filmsrit, meira føroyskt sjónvarpstilfar, fleiri leikir og týðingar, fleiri barnabøkur, fleiri ungdómsbøkur, fleiri undirvísingarbøkur á føroyskum og til føroyskt, fleiri ljóðbøkur innlisnar og tøknin gjørd til atkomiligheit, fleiri myndlistaverk, fleiri designvørur - til at njóta, nýta, læra, liva av og stimbrast av? Hetta vildu verið sjónligir og nyttuligir varðar fyri føroyska Eftirkoronalandið, og verið meiningsfult arbeiði hjá listafólkum at byrjað beint nú!

Til at fremja hetta í verki eiga vit at gera ein framleiðslupakka við minst hesum innihaldi:

- Markaðan pening til KVF at framleiða til børn og ung

- H óskandi upphædd til Ljóðbókatænastuna at avgreiða tøknina, avtalur o.a. til eina føroyska ljóðbókahill eins og at fáa sjónleikarar at lesa fleiri bøkur inn í ár og í 2021

- Eina serliga játtan yvir tvey ár til at týða útlendsk skaldaverk til føroyskt

- Serliga játtan til leiklistaøkið

- Eyka upphædd í 2020 og møguliga 2021 til filmsframleiðslu (fyrireiking, filmsritaskriving o.a.)

- Eyka upphædd til framleiðslu hjá sniðgevum

- Eyka upphædd til til myndlistarligt arbeiði og framleiðslu

- Eyka upphædd til tónlistarliga framleiðslu

- Eyka upphædd til at stuðla rithøvundum, sum skriva á føroyskum

- Eyka upphædd yvir eini 2 ár til at framleiða føroyskt undirvísingartilfar á miðnámi, m.a. talgildar bøkur (sum eru øgiliga góðar at hava í slíkum tíðum)

Hetta er ein hugsandi leistur – og ein møguleiki er at hækka upphæddir til skjótt tilstundandi umsóknarfreistir ella at gera nýggj málrættað umfør, sum kunnu setast í verk beinanvegin.

Í Mentunargrunni Landsins, Filmsjáttanini, Týðarajáttanini, Ljóðbókatænastuni, Vinnuframa, Kringvarpi Føroya og fleiri, eru førleikar at umsita og fyriskipa hetta arbeiði. Alternativt kann ein lítil embætisbólkur setast at skundfyrireika slíka íløgu. Óivað eru aðrir hættir at stuðla listafólkum í síni vinnu, nú mestsum øll vinna er hart rakt. Týdningarmikið er, ikki at draga slík átøk út!

Filmshúsið, Tónleikaútflutningstovan, Nám, Bókadeild Føroya Lærarafelags, LISA, Tjóðpallur Føroya, Leiklistaráðið, Sprotin, Kringvarp Føroya og fleiri hava vitan um bíðandi verkætlanir, ætlanir hjá listafakfólki, dygd, hollar mannagongdir, fíggjartørv, marknað og tílíkt.

Har sum viljin er, er ein vegur – bæði at bøta um korini hjá listafólki – og at gera íløgur, sum eru ómissandi fyri Føroyar mentanarliga, búskaparliga og á so mangan hátt!