Tað riggar í løtuni ikki at leggja lesarabrøv á Lesarin.fo umvegis Facebook.

Fyribils skulu lesarabrøv sendast til redaktion@knassar.fo, so leggja vit tað út fyri teg.

Heðin Mortensen má halda seg til veruleikan

2022-01-12 18:21

Borgarstjórin, Heðin Mortensen, skrivar í lesarabrævi, at eg sum formaður í Teknisku nevnd í seinastu setu havi ferðast runt í Danmark, Noregi og Íslandi at kunna meg um elbussar, uttan at minnilutin er sloppin við, og setur spurnartekin við mítt minni.

Fyri tað fyrsta, so havi eg tað at siga, at einasti túrur, sum vit á Tekniska økinum í Tórshavnar kommunu skipaðu fyri, var túrurin til Noregs. Har skal eg upplýsa, at allir limirnir í Teknisku nevnd vóru bodnir við, men tíverri góvu báðir limirnir í minnilutanum avboð. So at siga, at minnilutin ikki slapp við, er ein beinleiðis lygn.

Til hinar túrarnar er at siga, at tað har var annar fyriskipari við nógvum øðrum luttakarum. Teir túrarnir vóru til Danmarkar(Roskilde) og Ísland(Reykjavík). Har kann eg upplýsa Heðin Mortensen, at hann sjálvur luttók á túrinum í Danmark. Spell, at borgarstjórin skal seta spurnartekin við mítt minni, tá borgarstjórin ikki ein gang minnist sjálvur, at hann var við á túrinum.

Eg havi viðheft eina mynd, sum eg tók á kunnandi túrinum í Roskilde, har vit síggja borgarstjóran, Heðin Mortensen, koma gangandi út úr tí eina elbussinum, sum vit høvdu verið túr við. So kann lesarin sjálvur meta um trúvirðið í greinini hjá borgarstjóranum, og hvør av okkum báðum minnist betur.

Jú, mín partur skal ikki liggja eftir fyri at finna rættu loysnina til Bussleiðina. Vit mugu hava eitt sera gott grundarlag at taka støðu út frá, og vónandi fer tað at eydnast at finna eina framtíðarloysn, sum allir borgararnir verða nøgdir við og sum fer at gagna framtíðini.

Jákup Dam, býráðslimur og fyrrverandi formaður í Teknisku nevnd